“Mahal na Mahal kita…”
Hindi malaman ni April kung dapat niyang ikatuwa ang narinig na iyon. “No, Joaquin. Ayokong paasahin ka.” Hangga’t hindi siya lumalaya sa alaala ni Steven, mahihirapan siyang magmahal muli.
“Hindi ako umaasa. Tama na sa aking makasama ka kahit sandali. Masaya na ako. Alam kong hindi puwedeng maging tayo.” Nanunungaw sa mga mata nito ang luha.
Mahal din kita, gusto na niyang sabihin, ngunit hindi niya malaman sa sarili kung para nga kay Joaquin ang mga katagang iyon o para kay Steven na ipinapaalala lang ng lalaking ito sa kanya.
