Precious Hearts Romances - Cinderella 73 : Lovelee (The Queen Of Hearts)

Isang maid si Lovelee na nangangarap maging romance writer, kaya major blessing ang pagkakaroon niya ng among gaya ni Daphne Diaz, editor ng True Hearts Romances. Dahil dito, mas na-inspire siyang magsulat ng nobelang romansa. Ito ang ginawa niyang heroine sa kuwento niya. Nang makilala niya ang publisher ng THR na si OJ Uchiyama, ito naman ang ginawa niyang hero.
Nasimulan niya nang maayos ang kanyang manuskreto. Pero bakit ganoon? Sa kalagitnaan ng kuwento, hindi na si Daphne ang gusto niyang maging bida. Umiibig na siya sa hero ng kanyang kuwento!
Batid niyang pantasya lamang ang ibigin siya ng isang milyonaryong playboy na gaya ni OJ Uchiyama. Ngunit gaya ng heroine ng nobela niya, magkaroon din kaya ng happy ending ang love story niya?

Precious Hearts Romances - Cinderella 72 : Maja (The Foxy Princess)

Raket ni Maja ang manghula para kumita ng extra. Ang totoo, hindi talaga siya nakakakita ng future. Isa lamang siyang huwad na manghuhula. Kaya nga hindi niya nahulaang maganda pala ang kanyang kapalaran. She was destined to be the bride of the rich and handsome Denmark Villaruiz---on a prearranged wedding.
Ni sa panaginip ay hindi niya naisip na maaari siyang maging Cinderella. Pero may problema--ayaw sa kanya ng kanyang Prince Charming. At ayaw rin naman niya rito dahil napakaantipatiko nito. Kaya lang naman niya binubuntutan ito ay dahil gusto niyang parating inaasar ito dahil napakapikon nito.
Hanggang isang araw, natagpuan niya ang sariling umiibig na sa kanyang supladong prinsipe. Pero tila mahal pa rin nito ang ex nito.
May happy ending pa kaya ang fairy tale niya?

Precious Hearts Romances - Cinderella 20 : Hiyasmin (The Shell Seeker)

Umiikot lang ang buhay ni Hiyasmin sa beach house ni Tita Francia, ang taong nagpalaki sa kanya. Nagkaisip na siya sa beach house, nagsibli rito at sa anak nitong si Colette. Ang pinakamalayong narating niya ay ang baybayin sa labas ng bahay na nagagawa lang niya tuwing lumuluwas ang mga ito sa Maynila.
Marahil ay ganoon na lang talaga ang buhay niya, hindi malaya, habang-buhay na magbabayad ng utang-na-loob sa kanyang tita.
Ngunit nakilala niya si Guillermo nang minsang mamulot siya ng mga sigay sa aplaya. Napatanga siya nang matitigan niya ito. Maging ito ay titig na titig sa kanya. Natagpuan niya ang sariling minememorya ang bawat anggulo ng guwapong mukha nito.
Nakikipagkaibigan ito. Pero mabilis niya itong tinalikuran. Ayaw niyang suwayin ang isa sa mga bilin ni Tita Francia.
Ngunit nasilip niyang nakatanaw ito sa bahay.
Pangako, sa susunod na magkita kaming muli, susuwayin ko na si Tita Francia…